Ali Məhkəmə işə qəbul üzrə müsabiqə elan edir

Azərbaycan Respublikası Ali Məhkəməsi kadr ehtiyatının yaradılması məqsədilə Azərbaycan Respublikası vətəndaşları üçün müsabiqə elan edir. Müsabiqə test imtahanından və müsahibədən ibarətdir.

Ali Məhkəmənin Aparatında dövlət qulluğuna qəbul olunmaq istəyən şəxslərin hazırlığının, bilik səviyyəsinin, ümumi dünyagörüşünün, məhkəmə sistemində qulluğa yararlı və layiqli olmasının müəyyən edilməsi məqsədilə aşkarlıq şəraitində şəffaf üsullarla müsabiqə keçirilir.

Müsabiqədə iştiraka hüquqşünaslıq ixtisası üzrə ali təhsilə (hüquqşünaslıq ixtisası üzrə ən azı 5 il iş stajı və ya məhkəmə sistemində staj arzuolunandır) malik Azərbaycan Respublikasının vətəndaşları buraxılırlar.

Müsabiqəyə sənədlər cari ilin aprel ayının 7-dək qəbul edilir. Ərizələrin qəbulu müddəti başa çatdıqdan sonra təqdim olunan sənədlər qəbul edilmir.

Namizədlər bu müddət ərzində aşağıdakı sənədləri (surətləri müəyyən edilmiş qaydada təsdiq olunmaqla) Ali Məhkəmənin elektron poçt ünvanına (hr.sc@supremecourt.gov.az) təqdim etməlidirlər:

1. Şəxsiyyəti təsdiq edən sənədin surəti;

2. Kadrların uçotunun şəxsi vərəqəsi;

3. Tərcümeyi-hal;

4. Ali təhsil haqqında diplomun (xaricdə təhsil almış namizədlər üçün təhsil sənədlərinin (diplomların) tanınması (nostrifikasiya) ilə bağlı müvafiq sənədin) surəti;

5. Əmək kitabçasının surəti (olduğu halda);

6. Xasiyyətnamə və ya özünü xarakterizə edən başqa sənədlər;

7. Məhkumluq barədə arayış;

8. Sağlamlıq haqqında tibbi arayış;

9. Narkoloji dispanserdə qeydiyyatda olmaması barədə arayış.

Namizədlər, olduğu halda, xarici dil səviyyəsini təsdiq edən müvafiq sənəd barədə məlumatları (sənədin adını, nömrəsini, qısa məzmununu və xarici dil səviyyəsini) ayrıca təqdim etməlidirlər.

Ali Məhkəmənin müvafiq işçi qrupu tərəfindən namizədlərin təqdim etdiyi sənədlər yoxlanılaraq, sənədlərin tamlığı, düzgünlüyü və uyğunluğu müəyyən edildikdən sonra müraciətlər qeydiyyata alınır və bu barədə namizədlərə məlumat veriləcəkdir. Natamam və ya qaydalara uyğun olmayan müraciətlər qəbul edilməyəcək.

Namizədlər müvafiq sənədləri təqdim edə bilmədikdə və ya bu zaman hər hansı texniki problem yarandıqda (+99412) 489-0707 (dax: 18900) nömrəli telefonla Ali Məhkəməyə müraciət edə bilərlər.

Müsabiqənin test imtahanı Ali Məhkəmənin müəyyən etdiyi yerdə və vaxtda keçiriləcək və bu barədə namizədlərə əlavə məlumat veriləcək.

Müsabiqədə uğur qazanan namizədlər Ali Məhkəmənin kadr ehtiyatına daxil ediləcək və Ali Məhkəmənin Aparatında vakant dövlət qulluğu vəzifələri yarandıqca həmin namizədlərə iş təklif ediləcək.