Ümumdünya Əqli Mülkiyyət Təşkilatının ekspertləri ilə Ali Məhkəmədə görüş
19.04.2010, 12:352010-cu il aprelin 16-da ölkəmizdə səfərdə olan Ümumdünya Əqli Mülkiyyət Təşkilatının ekspertləri ilə Ali Məhkəmədə görüş keçirilmişdir.
Ali Məhkəmənin mülki işlər üzrə məhkəmə kollegiyasının sədri Şəlalə Məmmədova qonaqları salamlayaraq bildirmişdir ki, Azərbaycanda əqli mülkiyyətin mühafizəsi və müdafiəsi sahəsində milli strategiyanın işlənib hazırlanmasına Ali Məhkəmənin hakimləri də öz töhvəsini verməyə hazırdır. Bunun üçün onlar vaxtaşırı aktual təkliflərlə çıxış edirlər. Kollegiya sədri əqli mülkiyyət məsələləri ilə bağlı 20-dən artıq qanun və qanunqüvvəli normativ aktların qəbul edildiyini qeyd etmişdir.
Görüşdə Ümumdünya Əqli Mülkiyyət Təşkilatının bir sıra Avropa və MDB ölkələri üzrə departamentinin hüquqşünası Sergey Zotin və əqli mülkiyyət üzrə ekspert Ron Marçant Azərbaycan Respublikası Standartlaşdırma, Metrologiya və Patent üzrə Dövlət Komitəsi ilə birgə əqli mülkiyyət sahəsində milli strategiyanın işlənib hazırlanmasına hazırlıq işlərinin aparılması məqsədi ilə Azərbaycana gəldiklərini vurğulamışlar.
Görüşdə əqli mülkiyyət sahəsində hüquqların qorunması, kontrafakt məhsullara qarşı mübarizə məsələləri müzakirə olunmuşdur.
Görüşdə Ali Məhkəmənin hakimləri-Bağır Əsədov və Əsəd Mirzəliyev əqli mülkiyyətlə bağlı qanunvericilik bazasının təkmilləşdirilməsi zərurətinin əhəmiyyətindən danışmış, ekspertləri maraqlandıran suallara cavab vermişlər.
![](/uploads/images/News/2010/file1271667813305.jpg)
![](/uploads/images/News/2010/file1271667671063.jpg)
Göstərilən platformalarda paylaş: